拗柴記

今早一出門，好衰唔衰拗柴．痛到淚水直標．猶幸老媽子當時在場，總算是有個人給我倚傍．揉了幾下，轉了幾個圈，見行得走得，以為無事，便繼續原先安排先會合朋友，再下午上班．今晚回家脫掉襪子後，方發覺原來足踝附近腫了一大片．無怪乎走路乏力呢！

其實上天對我都不薄，皆因記憶所及，大部份時間我拗柴都有朋友或親人在身邊．痛歸痛，最起碼有人在旁安慰一下，自我感覺或多或少都會比較良好．

記得最慘的一次是穿著裙子加高跟鞋，一個人離開公司時，點知一出門口，差錯腳，好似生魚咁「僻啪」向前仆，手腳即刻流血兼瘀哂，而且當時大大話話都有十幾人加埋幾隻狗目擊此實況，當中更包括一些十分唔熟兼無乜風度的同事．最正係佢地等我自己爬番起身兼坐埋一邊時，先至走來問我係唔係好痛，嘩，反應咁敏捷，真係唔該哂！

又早排與家人到酒樓做冬，去洗手間途中又唔少心跣底，仲要個人一路向前滑，直至個頭「中」埋個櫃度才曉停．當時幾十對眼目睹此幕，（火羅）爆！

講番今日，當老媽子在街邊替我捽腳時，竟然喃喃自語道：「好在你係大肚腩，唔係大肚」．嘩，晨早流流聽埋Ｄ咁既野，真係好邪！