一個無聊的「思想家」

兒時喜歡看「叮噹」，貪其發明夠趣緻新奇．不過如果有一天我能夠擁有「叮噹」的法力，我想我會希望擁有以下法寶：

用於辦公室內－
一）「睇你唔到」眼罩：每當一笠上眼，便可以乜都睇唔見，一於眼不見為乾淨．建議用法乃如見到Ａ字膊同事，即笠上自己對眼，實行累鬥累，唔駛等自己因為睇唔過眼又無端端走去做埋人地果份．
二）「至欣賞你」催眠藥：用後會覺得對方好勁，好叻，天下無敵．建議用法乃食完後即刻僕去見懵炳老細，立時會覺得自己仕途一片光明，士氣高哂！
三）「假話」解碼器：能分辨說話真偽，從而令自己能辨別出誰是好人／壞人，唔駛等自己壯烈犧牲了都唔知為乜事．
四）「面皮」增厚器：始終出來做事，面皮太薄都係蝕章．既然自己做唔出面皮好似人地咁厚，便唯有靠機器幫補一下．
五）「吹你唔脹」吹波膠：一趙之後，對手便會思想癱瘓，冇哂你符．就算自己所持的只是歪理，對手亦只能張口結舌，失去辯駁能力．

用於日常生活上－
六）「愈食愈瘦」炸豬扒／炸雞翼：不用多解！
七）「自動熨衫機」：唔知點解，熨了這麼多年衫，仍然熨唔直．全自動，最好！
八）「想點就點」發夢器：只需輸入資料，便可夢到你想見的人，想到之地，以填補現實生活之不足．

係呀，我都真係幾無聊嫁，不過諗下又幾開心．

做人，有時無無聊聊咪幾好！