絕到呢...

公司裡，間唔中會有人心情好請食下午茶。

話說今日隔離部門老細K君傳來Email，話會請大家食Tea，主要是慰勞大家最近做得比較辛苦。於是，有同事上晝十一點經已決心留肚不吃午飯，等下午茶時方一併吃個夠，又經已盤算好陣間要柯打甚麼。有些同事則擺明唔同佢客氣，午飯時明明見她吃了整整一個飯盒，但見橫豎有人請，諗住點都叫番個厚多士加珍珠奶茶。於是赫然間，發現原來大家都真係不折不扣的香港人，慌死執輸行頭。但問心，雖然話只係兩個部門的同事有份，但估計人均消費成廿幾三十蚊，而兩個部門加埋大大話話成五十人，以下午茶來講都算幾入肉。

不過又咁，既然唔駛我比，就梗係話之你啦。等到3點3時，走去部門秘書處落單時，才發覺真係「香港乜(人)都有」。阿K君作為一個老細，果然英明有見地，兼且安排得「極有系統」。原來他吩咐了兩位秘書小姐幫佢做統籌，每人都要整個Excel表，上面有哂閣下芳明，仲要寫清楚每人點了些甚麼，然後再Email番比佢。這下可不得了，白紙黑字，邊個專叫貴野，邊個無乜幫手但搏大霧猛食猛食，真係一目了然。結果，同事上晝十一點一直嚷著要食的豬扒湯米，就梗係無出現在表上啦。

呢D咪就係叫「絕」囉!